ERKEKLIK JYNS MÄZINIŇ ADENOMASY: SEBÄPLERI, ALAMATLARY WE BEJERGISI

Erkeklik jyns mäzi – gormonlary we gormona meňzeş maddalary işläp çykarýan mäzli dokumadan we myşsalardan ybarat, uly bolmadyk agzadyr. Jyns mäzi kiçi çanaklykda, peşew haltanyň aşagynda ýerleşip, peşew çykaryjy kanalyň başlangyjyny gurşap alýandyr. Bu agza dölüň düzüminiň esasyny düzýän we erkeklik jyns öýjükleriniň hereketjeňligini amala aşyrýan suwuklygy işläp çykarýar.

Erkeklik jyns mäziniň adenomasy – bedeniň gormonal durkuny üýtgedýän we erkek adamynyň peşew bölüp çykaryjy ulgamyna we seksual işjeňligine täsir edýän çynlakaý çemeleşmeli keseldir.

Jyns mäziniň adenomasynyň sebäpleri:

↪ Ýaşa görä döreýän üýtgemeler;

↪ Bedende döreýän gormonal üýtgemeler: erkek we aýal gormonlarynyň gatnaşygynyň üýtgemegi;

↪ Beden agramynyň artykmaçlygy, semizlik;

↪ Çilimiň aşa köp çekilmegi we alkogol içgileriň artykmaç kabul edilmegi;

↪ Iýmitlenişiň bozulmagy: ýiti we ýagly iýmitleriň artykmaçlygy;

↪ Gan basyşyň ýokarlanmagy.

Keseliň alamatlary we geçiş tapgyrlary

Jyns mäziniň ulalmagy adam tarapyndan duýulman biler, ýöne öz bedeniňde syn edilýän alamatlara ünsli bolmak adenomanyň döreýänligini güman etmäge esas döredip biler.

↪ Keseliň başlangyç tapgyry köp halatlarda buşukmalaryň 5-8 gezege çenli ýygylaşmagy bilen başlanýar. Ýygy buşukmalar has hem gije ýüze çykýar we kem-kemden kynlaşýar, çygylmaly bolýar. Ilkibada peşew haltada galyndy peşew bolmaýar, çünki ony boşatmaga peşew haltanyň diwarlarynyň myşsalary kömek edýär. Başlangyç tapgyryň dowamlylygy her kimde üýtgeşik bolsa-da, köplenç 10-12 ýyla çenli dowam edýär.

↪ Keseliň ikinji tapgyry has aýdyň bildirýän alamatlar bilen geçýär. Çykýan peşewiň çüwdürimi has gowşak we arakesmeli bolýar, näsag peşew çykarmak üçin çygylmana mejbur bolýar. Peşew haltanyň myşsalary gowşaýar, myşsa süýümleri bolmadyk bölekleri bolsa süýnýär we haltajyklary (diwertikul) emele getirýär. Şol süýnen bölekaralarda galyndy peşew ýygnanyp, onuň umumy mukdary 100-500 ml, kähalatlarda 1 litr we ondan hem köp bolup biler. Peşew haltanyň nemli örtüginde döreýän gödek, arasy peşewli ýygyrtlar ýokarky peşew çykaryjy agzalardan peşewiň gelmegine bökdençlik döredýär. Netijede, peşew akarlarda we böwreklerde peşewiň durgunlylygy döreýär. Bu ýagdaý peşew haltanyň (sistit) sowuklamasyny döredip biler. Bu tapgyrda wirusly keseller, stres, spirtli içgileriň içilmegi peşew etmäniň kesilmegine getirip biler: peşew etme islegi ýamyzda, gasykda, bilde döreýän agyrylara geçip biler.

↪ Keseliň soňky tapgyrynda peşew haltanyň ýygrylma häsiýetiniň peselmegi sebäpli galyndy peşewiň mukdary 1,5-2 litre çenli köpelip bilýär. Peşew halta aşa süýnýär, onuň düýbi göbege ýa-da ondan hem ýokarda bildirip bilýär. Peşew haltanyň duýujylygynyň peselmegi sebäpli näsaglar buşukmanyň saklanmagyndan az kösenýärler we gowulaşandyryn öýdýärler. Süýnen peşew haltadan hemişe damja görnüşinde peşew bölünip çykýar. Näsaglar ýörite peşew kabul ediji enjamy ulanmaga mejbur bolýarlar. Keseliň soňky tapgyry böwregiň işiniň bozulmagy, peşew çykaryş ýollarynyň ýiti sowuklama keselleri, buşukmanyň doly kesilmegi bilen gaýraüzülip bilýändir.

Bejeriliş usullary

Erkeklik jyns mäziniň adenoma keseliniň bejergisi näsagyň ýaşyna, keseliň tapgyryna, keseliň gaýraüzülmelerine baglylykda urolog lukmanynyň gözegçiligi bilen geçirilýär.

Derman serişdeleri bilen bejergi esasan dörän alamatlary ýeňilleşdirmäge we jyns mäziniň dokumasynyň kadasyz ösüşini gowşatmaga gönükdirilendir. Bejergi üçin mäziň gan aýlanyşygyny gowulandyrýan, adrenoblokator, 5-alfa-reduktaza toparynyň dermanlary, antibiotikler, ösümliklerden taýynlanan dermanlar, immun ulgamyny tijendiriji serişdeler tapgyrlaýyn ulanylýar.

Bejergi üçin azinwaziw usullar hem ulanylýar:

↪ Transuretral mikrotolkunly bejergi – uly bolmadyk adenomalarda ulanylýar. Peşew çykaryş kanalyna girizilen kateter arkaly mikrotolkunlar berilýär. Mäziň dokumasy gyzdyrylyp, dargadylýar.

↪ Transuretral lazer waporizasiýasy – uly bolmadyk adenomalarda ulanylýar. Peşew çykaryş kanalyna girizilen kateter arkaly çişe lazer bilen täsir edilýär. Netijede, mäzdäki çiş kiçelýär.

↪ Uly kuwwatly fokusirlenen ultrases – bu bejergi usulynda erkeklik mäzine mikroskopiki kamera we ultrases şöhlelendiriji goýulýar we çiş ýylylyk bilen dargadylýar.

↪ Stent goýmak – peşew çykaryjy kanala goýulýan stent çykýan peşewiň mukdarynyň köpelmegine kömek edýär.

↪ Kriobejergi – sistoskop abzalyň kömegi bilen erkeklik jyns mäziniň dokumasy suwuk azot bilen işlenilip, çiş dargadylýar.

Erkeklik jyns mäziniň ulalmagy gaýraüzülmeleriň ýüze çykmagy bilen geçýän ýagdaýlarda açyk hirurgiki usullar ulanylýar:

↪ Erkeklik jyns mäzini aýyrmak – umumy agyrysyzlandyrma usuly bilen geçirilýär. Mäziň böleklerini aýryp, peşewi çykarylýar.

↪ Peşew çykaryjy kanal arkaly bölekleýin aýyrmak – azinwaziw bejergi bolup, uly bolmadyk adenomada geçirilýär. Peşew çykaryjy kanal arkaly mäziň bölekleri aýrylýar we soňundan mäziň ösmegini togtadýan dermanlar ulanylýar.

↪ Erkeklik jyns mäziniň arteriýalarynyň embolizasiýasy – but arteriýasynyň üsti bilen girizilen kateter jyns mäziniň arteriýasyna ýetirilýär we olaryň içini ýapýan mikrosfera bölejikleri göýberilýär. Mäziň dokumasy işmitlenilýär we mäziň ulalmagy togtadylýar.

Jyns mäziniň adenomasyny aýyrmak bilen geçirilýän hirurgiki bejergilerden soň käbir gaýraüzülmeleriň ýüze çykmagy mümkindir: jyns höwesiniň peselmegi, peşew çykarma bilen bagly kynçylyklar. Şol sebäpden hem başlanylan bejerginiň doly alynmagy we urolog lukmanyň kadaly gözegçiligi wajypdyr.