MAGNIÝ NERW DARTGYNLYGY KÖŞEŞDIRIP, BEÝNINIŇ IŞINI SAZLAMAGA ÝARDAM BERÝÄR
Adamyň ýaşaýyşyny käbir witaminsiz we mikroelementsiz göz öňüne hem getirip bolmaýar. Mysal üçin, hemmelere belli bolan C witamini. Biziň ählimiz onuň peýdaly häsiýetlerine, şeýle hem düzüminde C witamini bar bolan iýmit önümlerine beletdiris. Şunuň bilen baglylykda, C witamini ulanmagy çäklendirýän berhiz saklananda, düzümi C witaminsiz önümleri ulanmak kyn bolýar. Şol bir wagtyň özünde-de, adam käbir witaminleriň we mikroelementleriň bolmadyk ýagdaýynda hem ýaşap bilýär. Emma onuň bedeni bolmalysy ýaly saz işläp bilmeýär. Şeýle "sazlaýjy" elementlere magniý hem degişlidir. Ol biziň bedenimizde köp işleri ýerine ýetirýär. Ýöne olaryň ikisi: kelle beýnisiniň esasy işlerini ýerine ýetirilmegine ýardam bermek we nerw ulgamynyň işini gowulandyrmak has hem wajypdyr. Umuman, magniý biziň bedenimizde 300-den gowrak biohimiki fermentatiw reaksiýalary ýerine ýetirýär. Olaryň esasy bölegi kelle beýnisi ýa-da onuň işi bilen baglydyr.
Britaniýaly alymlar toparynyň geçirýän barlaglaryna görä, magniý örän wajyp neýromediator bolup, biziň bedenimiziň rahatlygy we sazlaşygy gazanmak ukybyna jogap berýär. Şikeslenmeden, güýçli nerw dartgynlygyndan soňky ýagdaýlarda ýa-da dürli ruhy çökgünlikde magniniň ornuny tutup biljek zat ýokdur. Ol biziň bedenimiziň işini kortizolyň we noradrenaliniň ölüm howply täsirinden goraýar. Amerikanyň Tehas ştatyndaky Ostin uniwersitetiniň alymlarynyň geçiren barlaglarynyň netijesinden belli bolşy ýaly, magniý kabul edýän adamyň kelle beýnisiniň işi kadalaşýar we ýatkeşligi has gowulaşýar. Magniniň esasy aýratynlyklarynyň biri – onuň neýrotrofiki faktorlaryň bölünip çykmagyna itergi bermegidir. Bu faktor öýjükleriň garramagynyň öňüni alyp, olaryň ýaşarmagyna ýardam berýär. Şeýlelikde, beýleki ýerine ýetirýän işlerinden başga-da, biziň beýnimizi Alsgeýmeriň keseli ýaly dürli degeneratiw kesellerden goraýar. Şeýle hem alymlar magniniň yzygider ulanylmagynyň beýniniň öýjükleriniň geçirijiliginiň görkezijilerini ýokarlandyrýandygyny, gorky, biynjalyklyk we şikeslenmeden soňky ýagdaýlaryň täsirine düşmegi aradan aýyrýandygyny ýüze çykardylar.
Ulanylan WEB Salgy