COCA-COLA-NYŇ GURAMALARA WE ÇÄRELERE MALIÝE SERIŞDELERINI BERÝÄNLIGINIŇ ÜSTI AÇYLDY
Täze gözlege görä, Coca-Cola kompaniýasy jemgyýetçilik saglygy goraýyş konferensiýalaryna we çärelerine hemaýatkärlik edýär. Bu hemaýatkärlikler kompaniýa konferensiýalaryň gün tertibini we olarda çykyş etjekleri saýlamaga pursat beripdir.
Public Health Nutrition Journal-da çap edilen gözleg, Coco-Cola-nyň Amerikanyň pediatriýa akademiýasy (AAP), Iýmit we berhiz akademiýasy (AND), Semizlik jemgyýeti (OS) we Amerikanyň maşgala lukmanlarynyň akademiýasy (AAFP) ýaly esasy saglygy goraýyş edaralary bilen hyzmatdaşlygyny ýüze çykardy. 2020-nji ýylda geçirilen gözlegiň netijesi, kompaniýanyň fiziki işjeňligi öňe sürýän "Bedenterbiýe we jemgyýetçilik saglygy boýunça halkara kongresini" guramaga kömek edendigini görkezdi.
Şeýle hem, Coca-Cola saglyga ýaramsyz önümlerine we kompaniýa garşy gelýän ylmy barlaglary we pikirleri basyp ýatyrmaga täsirini ýetiripdir. Mundan başga-da, kompaniýa semizligiň sebäbi şekerli içgiler däl-de hereketsizlik diýip wagyz etmegi goldapdyr. Şeýle etmek bilen Coca-Cola özüni "ylma dostlukly" diýip görkezmek isleýär.
Käbir hemaýatkärlikler üçünji taraplaryň üsti bilen berilipdir. Şol sebäpli, alymlar özlerine Coca-Cola-nyň hemaýatkärlik berýäninden habarsyz bolmagy mümkindigi gözlegde bellenilýär.
Coca-Cola-nyň göni we gytaklaýyn maliýeleşdirişi
Gözleg 239 sany jemgyýetçilik we hususy çäräni gözden geçirdi. Coca-Cola kompaniýasy 158 guramany, şol sanda 98 konferensiýany, 21 simpoziumy, 10 leksiýany, 14 hususy ýygnagy, 1 amaly sapagy, 3 webinary, 3 okuw sapagy, 3 forumy we 3 paneli göni ýa-da gytaklaýyn maliýeleşdiripdir.
Kompaniýanyň bölekleýin maliýeleşdiren 158 çäreleriniň 28 sanysyna göniden-göni we 70 sanysyna üçünji taraplaryň üsti bilen pul beripdir, hem-de 60 sany çykyş edijileri (spikerleri) maliýeleşdiripdir.
Guramaçylara berilen maliýe serişdeleri her çärä üçin $2500-$100.000 aralygynda.
Gözlegde mälim edilişine görä, köplenç Coca-Cola öz bähbitlerini goldaýan alymlary mediýada çykyş etmäge höweslendiripdir we semizligiň esasy sebäbi şekerli içgileriň däl-de, fiziki hereketiň azlygy diýip wagyz edýän ylmy gözlegleri, programmalary, çäreleri goldapdyr.
"Köpçülikleýin habar beriş serişdelerine (KHBS) berilýän maliýe serişdeleri bizi aladalandyrýar. Çykyş edijileri KHBS-de [Coca-Cola-nyň bähbitlerini goldap] çykyş etmäge itermek bilen kompaniýanyň ylymy aragatnaşykda täsiri uly bolup biler" – diýip gözlegiň awtory belleýär.
Gözleg diňe bir jemgyýetçilik saglygy babatda konferensiýalary gurnaýjylara däl, eýsem çykyş edýänlere-de berilýän maliýe serişdeleri aýan etmegi maslahat berýär.
Çeşme: Environmental Health News