Üns ber! Saýtyň esasy maksady Siziň saglyk babatdaky gözýetimiňizi giňeltmekdir. Şonuň üçin-de, saýtda berilýän maglumatlar esasynda öz-özüňi bejermek maslahat berilmeýär. Öz-özüňi bejermeklik düýpli kynçylyklara uçradyp, janyňyza howp salyp biler. Saýtdaky makalalar, materiallar we beýleki maglumatlar bilim maksatly bolup, lukmanyň bejergisiniň ýa-da maslahatynyň ýerini tutup bilmeýär.
DODAKLAR NAME ÜÇIN ÝARYLÝAR?
Hormatly okyjy!
Dodagyň gurap ýarylmagy, soýulmagy esasan gyş paslynyň sowuk günlerinden soň bolup biler. Sowuk howada dodaklaryň nemlenmesi peselip, olaryň gan aýlanyşygy bozulýar. Netijede, jaýryjaklar we soýulmalar döräp biler.
Şeýle-de, şunuň ýaly ýagdaýa witamin ýetmezçiligi, allergiki täsirliligiň ýüze çykmagy, nerw ulgamyň we galkan şekilli mäziň işiniň bozulmalary getirip biler.
Ýüze çykan kynçylygy aradan aýyrmak üçin, aşakdaky çäreleri maslahat berip bileris:
- Dodaklary ýalama, agzyňyzdan dem alma endiginden dynjak boluň. Bu endikler dodaklaryň guramagyna getirýär.
- Witamin ýetmezçiligini aradan aýyrmak üçin (esasan hem A we B witaminleri) witamin gerdejiklerini kabul ediň. Ir-iýmişleri, maňyzlary, balygy, bagry iýiň.
- Köp suwuklyk kabul ediň. Esasan hem ýaz-tomus aýlary 2 litre golaý suw içiň.
- Ýylyň sowuk günleri dodagyňyzy ýörite krem bilen, gün şöhleleriniň köp günleri nemlendiriji goraýjy kremleri (dermanhanalarda satylýar) çalyň.
- Dodaklara ösümlik ýagy bilen baldan, mesge bilen gyrgyçdan geçirilen almadan, çekize (tworog) bilen käşir şiresinden ýasalan ýapgylary çalyp, 10-15 minutdan soň süpürmek peýdalydyr.
- Bejergi wagty düzüminde ftor saklaýan diş pastalaryny ulanmakdan saklanyň. Olar hem dodagyňyzyň zeperlenmegine hem-de guramagyna getirip biler.
- Dodaklara ýörite hereketler bilen maşklar geçirmek, ýumşak diş çotgasy bilen owkalama geçirmek peýdaly bolar. Olar gan aýlanyşygyny gowulandyryp, dodaklaryň özbaşdak nemlenmegine täsir edýär.
Hormat bilen saýtyň lukmany.
- 3689 gezek okalan